Tokante BES(t) 4 kids

Kalidat

Akohida di mucha i akohida despues di skol di bon kalidat i responsabel ta di gran importansia. Muchanan mester sinti nan mes seif i haña espasio pa desaroyá nan mes. Pa e motibu ei ta stipulá eksigensianan di kalidat den legislashon i den ordenansanan insular. E eksigensianan aki ta trata asuntunan manera kuido pa e mucha i su desaroyo, siguridat, higiena i alohamentu.

Download foyeto Eksigensianan di kalidat Akohida di mucha Boneiru
Download foyeto Eksigensianan di kalidat Akohida di mucha Sint Eustatius i Saba (Inglès)

E meta ta pa tur organisashon ku ta ofresé akohida pa mucha òf fasilidatnan despues di skol, ta kumpli ku e eksigensianan di kalidat na 2023.

E Entidatnan Públiko ta sostené e organisashonnan di akohida pa mucha i akohida despues di skol den mehorashon di e kalidat.

Algun pilá importante pa mehorashon di e kalidat ta:

Un desaroyo di e mucha kontinuo ta importante. E responsabilidat pa esei ta kuminsá na e akohida di mucha. For di e edat obligatorio di enseñansa di 4 aña ta bira importante tambe ku tin un liña di enseñansa kontinuo.

E transishon for di akohida di mucha, pa skol básiko, ta hopi grandi pa algun mucha di 4 aña. Ta investigá si ta posibel pa hasi e transishon aki mas fásil pa e mucha. Pa esei ta esensial ku tin bon palabrashon entre e organisashonnan di akohida pa mucha i e skolnan básiko. Inspekshon di Enseñansa lo pèrkurá pa e eksistensia di tal palabrashonnan i un bon traspaso di mucha tantu na e organisashonnan di akohida pa mucha komo na e skolnan.

Ku edukashon preeskolar ta posibel pa prevení òf redusí retraso den desaroyo i enseñansa serka mucha.

Pa e motibu ei e Entidatnan Públiko ta haña deseabel pa kada organisashon di akohida pa mucha traha riba edukashon preeskolar. Nan ta hasi esfuerso pa introdusí e programa Kaleidoscoop (High Scope) den akohida di mucha. Esaki ta un programa edukativo pa muchanan di 2,5 te 6 aña. Ta stimulá skolnan básiko tambe pa usa Kaleidoscoop den grupo 1 i 2.

Siña hungando ta importante pa e desaroyo di muchanan hóben. Den edukashon preeskolar ta ofresé aktividatnan den forma di wega pa yuda muchanan desaroyá. Tambe tin temanan ku ta kambia. Si akohida pa mucha i edukashon básiko sinkronisá e temanan aki, esaki tambe ta kontribuí na un traspaso fleksibel di mucha pa skol básiko

Pa ofresé akohida di mucha responsabel i di bon kalidat ta nesesario ku kolaboradónan profeshonal ta bon eduká.

Tambe ta importante ku denter di e organisashon di akohida tin sufisiente ekspertisio riba e tereno di edukashon preeskolar i pa señalá retraso den desaroyo i siñamentu. Banda di esei e Entidatnan Públiko ke pa kada organisashon traha for di e mesun metodologia pedagógiko.

Pa e motibu ei a prepará un plan di formashon pa sostené organisashonnan lokal den preparashon di personal. Ku esei tur organisashon por kumpli ku e eksigensianan ku a poné.

Bon akohida di mucha i fasilidatnan despues di skol ta rekerí bon maneho  di e organisashon. Gerente i direktor mester ta konsiente di nan funshon-, ròl- i responsabilidatnan i mester ta kapas pa kumpli bon ku esakinan. Den konsulta ku e organisashonnan ta ofresé sosten riba e tereno aki.

Pa por atraé personal bon eduká, tin mester di kondishonnan di trabou atraktivo i bon empleo. Na final di 2020, komienso di 2021 a tuma lugá un investigashon di e kondishonnan laboral primario i sekundario na Hulanda Karibense. Basá riba e resultado- i konsehonan di e investigashon akí e programa BES(t) 4 kids a traha un struktura salarial provishonal pa empleado pedagógiko. E struktura salarial provishonal akí ta un liña di guia pa dunadó di trabou i empleado den akohida di mucha. Kada dunadó di trabou mes ta stipulá e kondishonnan laboral i pues e pago di e empleado pedagógiko.

E intenshon ta finalmente pa yega na un kontrato kolektivo (CAO Akohida di Mucha Hulanda Karibense). Akiden por palabrá asuntunan manera salario mínimo, (plaka di) fakansi i penshon pa tur hende ku ta traha den akohida di mucha. Sinembargo no ta regla un CAO Akohida di Mucha di un dia pa otro. Tin hopi partido embolbí den esei. Pa tòg stimulá un promé mehorashon riba término kòrtiku, e programa BES(t) 4 kids ta introdusí e pakete di kresementu.