Pa start ku un akohida di mucha, un pèrmit di eksplotashon ta obligatorio. Bo mester pidi e pèrmit aki por eskrito serka e Entidat Públiko, na atenshon di e Kolegio Ehekutivo (BC). Mester hasi esaki tambe ora bo ke hasi kambio den datonan den e pèrmit.

• Bo mester manda e siguiente informashon i dokumentonan tambe huntu ku e petishon:
  • Un kopia di e pèrmit di establesimentu
  • Ora e ta un negoshi di un persona: nòmber, adrès, number di telefòn i un prueba di inskripshon serka Kámara di Komersio (no mas ku 3 luna bieu)
  • Ora e ta un persona hurídiko: nòmbernan, adrèsnan, fechanan di nasementu di e miembronan di direktiva/gerensia, un kopia di e statutonan, prueba di inskripshon serka Kámara di Komersio (no mas ku tres luna bieu) i, si esaki ta aplikabel, un kopia di e registro di akshon
  • Pruebanan di inskripshon den registro sivil di e petishonario i e kolaboradónan, i un ekstrakto di e títulonan di estadia i/òf pèrmitnan
  • Un Deklarashon tokante Kondukta (VOG) di e petishonario i e profeshonalnan, no mas ku tres luna bieu
  • E kantidat máksimo di mucha i e edat di e muchanan pa kada parti di dia
  • E kantidat máksimo di profeshonalnan pa kada parti di dia
  • E orario di apertura i di seramentu
  • E adrès (proponé) di e akohida
  • E plan di maneho pedagógiko i edukativo di e sentro di mucha
  • E plan den fase di e kódigo di violensia doméstiko i maltrato di mucha di e sentro di mucha
  • E maneho di siguridat i salubridat di e sentro di mucha
  • Un mapa di e akohida (ku e midínan di e espasionan paden i pafó)
  • E prueba di pago pa e leges
• BC ta disidí si bo ta haña e pèrmit. BC ta pidi konseho serka e komishon di kalidat pa esei. Tambe, BC ta puntra inspekshon si e akohida di mucha por kumpli ku e reglanan den lei. E komishon di kalidat ta duna un konseho kompleto i BC ta disidí.
• E prosedura di petishon generalmente ta dura mas o ménos dos luna. E periodo aki ta kuminsá kana solamente ora a entregá tur dokumento. Si ainda falta dokumento, e petishonario ta haña kuater siman pa entregá esakinan ainda. Solamente ora tur kos ta kompleto, e prosedura por kuminsá ofisialmente. Si e petishonario no entregá e dokumentonan nesesario denter di kuater siman, lo no tuma e petishon den konsiderashon.
• E petishonario ta risibí un karta ku informashon tokante e prosedura.
  • Ora e petishon ta kompleto, denter di dos siman Kolegio Ehekutivo ta pidi konseho serka e komishon di kalidat i inspekshon. Nan ta duna konseho denter di kuater siman.
  • Despues, Kolegio Ehekutivo ta tuma un desishon denter di dos siman.
  • Tin biaha mester di mas tempu. E ora ei por ekstendé e periodo aki ún biaha ku maksimalmente dos siman. Lo informá e petishonario tokante esaki.
• Ta duna un pèrmit pa un tempu indefiní.
  • E pèrmit ta pa un persona òf un organisashon spesífiko, i ta konta solamente pa e lokalidat pa kua a pidié.
  • No por traspasá e pèrmit. Ora e nòmber riba e pèrmit kambia, mester notifiká e Entidat Públiko di esaki por eskrito.
• Mester kologá e página dilanti di e pèrmit den e lokalidat na un kaminda ku e ta bon visibel. Riba dje tin e nòmber i e adrès di e portador di e pèrmit i e direktiva, e tipo di akohida di mucha, i e kantidat máksimo di mucha (ku e edatnan) ku por duna akohida.

Huntu, Inspekshon di Enseñansa i e ámtenarnan di e Entidat Públiko (e inspekshon lokal) ta supervisá kalidat di e akohida di mucha. Inspekshon di Enseñansa tin e responsabilidat final pa e supervishon aki. Den e promé añanan despues ku e lei ta drenta na vigor, e inspekshon partikularmente ta enserá un supervishon pa stimulá. Esei ta nifiká ku Inspekshon prinsipalmente ke yuda mehorá kalidat di e akohida dor di kontrolá si kalidat di e akohida di mucha ta sufisiente.

• Tur aña, Inspekshon di Enseñansa i e inspekshon lokal ta investigá tur lokalidat di akohida di mucha. Nan ta wak si e akohida ta kumpli ku tur e reglanan den legislashon i regulashon. Nan ta usa un bista general spesial pa esaki, ku puntonan pa paga tinu riba dje (kuadro di baluashon).
• Por anunsiá un bishita di inspekshon adelantá, pero e por ta inesperá tambe. Inspekshon ta wak no solamente e dokumentonan, pero ta bin wak den e gruponan tambe. Nan ta papia ku e direktiva, e maneho i e kolaboradónan. Tin biaha, nan ta papia ku muchanan i mayornan tambe.
• Despues di e investigashon, Inspekshon ta skibi un informe ku e resultadonan i ku tareanan (di mehorashon) eventual, pa e kosnan ku tin ku mehorá.
  • E doño di e akohida di mucha òf gastouder promé ta haña un konsepto di e informe. Si e ta kontené erornan, e doño di e akohida di mucha òf gastouder por reakshoná denter di dos siman – por eskrito òf verbalmente.
  • Tambe, e doño di e akohida di mucha òf gastouder (den e tempu entre e konsepto i e informe definitivo) ainda por manda dokumentonan ku ta falta, pa kumpli ku e eksigensianan. E ora ei eventualmente, Inspekshon por adaptá e informe (i un huisio).
  • Despues, lo hasi e informe definitivo i pon’é riba e wèpsait di Inspekshon di Enseñansa. Ainda, e doño di e akohida di mucha òf gastouder por duna un opinion (punto di bista) tokante e informe final sí, i lo inkluí esaki e ora ei den e informe.
• Fuera di e investigashon normal anual, Inspekshon por hasi investigashon èkstra tambe:
  • Investigashon mas aleu ora e akohida mester a mehorá algu. E ora ei, Inspekshon ta wak si a hasi esaki di un manera sufisiente.
  • Investigashon insidental ora tin keho òf preokupashon, por ehèmpel di parti di mayornan, ku por forma un riesgo pa mucha. E ora ei, Inspekshon ta investigá si e akohida ta kumpli ku e reglanan pa ku 1 òf mas aspekto di kalidat.

Den e kuadro di baluashon di Inspekshon di Enseñansa tin pará kiko Inspekshon ta paga tinu riba dje durante un bishita di inspekshon.

• E kuadro di baluashon tin 4 parti (áreanan di kalidat) ku na tur, 32 aspekto di kalidat pa sentronan di mucha i 26 pa gastouder.
• Na kada parti Inspekshon ta hasi un pregunta sentral. Pa kontestá e pregunta ei, Inspekshon ta wak reglanan di lei. E partinan ta:
  • Atministrashon, Personal i Alohamentu (APH): e akohida ta kumpli ku e eksigensianan riba tereno di atministrashon, personal, i alohamentu?
  • Siguridat, Salubridat i Klima Pedagógiko (VGP): e ta seif i saludabel pa e muchanan?
  • Akohida di mucha i Siña Rekreando (KS): e muchanan ta sufisientemente stimulá den nan desaroyo?
  • Kuido di kalidat, Kultura di kalidat i Responsabilisashon (KKV): e direktiva ta duna sufisiente guia pa mehorá e kalidat?
• Ora un akohida di mucha ta kumpli ku e eksigensianan ku ta konta pa un aspekto di kalidat, e akohida ta haña un baluashon ‘sufisiente’ pa esaki. Esei ta nifiká ku e akohida ta kumpli ku e kalidat básiko, pues ku tur legislashon i regulashon tokante e aspekto di kalidat.
• Inspekshon ta duna un baluashon ‘bon’ ora e akohida di mucha ta kumpli ku e eksigensianan legal i fuera di esei, ainda tambe ta realisá ambishonnan propio tokante e aspekto di kalidat ei.
• Ora un akohida di mucha no ta kumpli ku e eksigensianan ku ta na vigor pa un aspekto di kalidat:
  • E akohida di mucha ta haña un baluashon ‘insufisiente’ ora ta trata di un aspekto di kalidat den e áreanan di kalidat Atministrashon, Personal i Alohamentu òf Siguridat, Salubridat i Klima Pedagógiko. E ora ei, Inspekshon ta duna un órden pa mehorashon, ku un término di mehorashon kla. Ora ta trata di siguridat i salubridat di mucha i personal, mester bin ku solushon rápidamente, i e término di mehorashon lo ta kòrtiku. E ora ei,  Inspekshon ta bin bèk despues di e término di mehorashon pa kontrolá.
  • Te ku aña 2030, Inspekshon ta papia di un ‘punto di mehorashon’ ora ta trata di un aspekto di kalidat den e áreanan di kalidat Akohida di mucha i Siña Rekreando òf Kuido di kalidat, Kultura di kalidat i Responsabilisashon. E ora ei, e akohida ta haña maksimalmente un aña pa mehorá esaki. Inspekshon ta kontrolá esaki durante e bishita di e aña siguiente.

Inspekshon ta wak kiko ta sufisientemente bon, i kiko por i mester ta mihó. Inspekshon ta diskutí esaki durante e investigashon, den e kòmbersashon final, i ta skibi esaki den e informe.

• Ora un aspekto di kalidat ta insufisiente, Inspekshon ta hasi afspraknan ku e akohida tokante kiko mester mehorá. E término di mehorashon e ora ei generalmente ta ménos ku un aña. Den kaso di un punto di mehorashon, e término di mehorashon generalmente ta un aña.
• Ora e akohida no ta kumpli ku e eksigensianan legal, no ta kumpli ku e palabrashonnan hasí, òf vários biaha ta keda sin ehekutá un órden di mehorashon, Inspekshon por tuma medidanan mas severo:
  • Un òrdu pa paga but: ora un organisashon (bolbe) keda sin ehekutá e órden, e mester paga sèn.
  • Un but: ora por bisa ku kada bes ta keda sin kumpli ku e afspraknan.
  • Seramentu temporal: ora tin peliger direkto pa siguridat òf salubridat di mucha.
  • Konseho por hala e pèrmit aden: ora un akohida di mucha violá e reglanan kada bes di nobo, Inspekshon por konsehá e Entidat Públiko pa hala e pèrmit aden.

Lo publiká e informe den e di tres siman despues di su determinashon, riba e wèpsait di Inspekshon di Enseñansa: https://toezichtresultaten.onderwijsinspectie.nl/.

• E informe ta kontené lo siguiente:
  • E resultadonan, evaluashonnan i baluashonnan pa tur e aspektonan di kalidat.
  • Un bista general di kon e akohida ta desaroyá su mes i kiko ta e kosnan den e ambiente ku ta influensiá e kalidat (konteksto).
  • E órdennan di mehorashon i kuantu tempu a duna pa nan.
  • Ora e akohida a entregá un reakshon propio (punto di bista), esei tambe ta den e informe.
• E akohida tambe mester pone e informe riba su wèpsait propio òf pon’é na un kaminda ku ta fásil pa e mayornan i kolaboradónan hañ’é.
• Tur hende ku direktamente tin di haber ku e akohida (un stakeholder) por oponé e publikashon por eskrito. Mester hasi esei denter di seis siman despues di e fecha ku a manda e informe.