Akohida di mucha i finansiamentu di akohida di mucha ta reglá a base di un kontrakt di akohida di mucha entre e akohida di mucha i e mayor(nan).

• Den e kontrakt di akohida di mucha tin e afspraknan tokante e akohida di e mucha. Por ehèmpel, e tipo di akohida, kuantu parti di dia e mucha ta bini pa siman, i kuantu e mayor ta paga. Riba www.rijksdienstcn.com/akohidadimucha bo ta haña tur informashon ku mester ta pará  den un kontrakt di akohida di mucha.
• Ademas di e informashon obligatorio, bo por pone otro afspraknan den e kontrakt di akohida di mucha tambe. Por ehèmpel: oranan di apertura, dianan di estudio, akohida èkstra òf seramentu den fakansi, uso di potrèt òf video, òf deseonan rondó di nutrishon i alergianan.
• Bo no mester inkluí e kontrakt(nan) di akohida di mucha ku bo a sera ku mayor(nan) ora bo akohida di mucha pidi kompensashon serka e Unidat SZW di RCN. Pero bo mester warda e areglo firmá den bo atministrashon, sí. E Unidat SZW di RCN por pidi p’e despues, relashoná ku kontrol di datonan.

Un akohida di mucha tin derecho riba kompensashon pa akohida di mucha di e Unidat SZW di RCN ora kumpli ku e siguiente kondishonnan:

• E akohida di mucha tin un pèrmit di eksplotashon bálido.
• Tin un kontrakt di akohida di mucha firmá. Den e kontrakt aki tin e afspraknan entre e mayor(nan) i e akohida di mucha. Tambe, e mucha realmente mester hasi uso di e akohida.
• E mayor(nan) í e mucha ta registrá na e isla komo residente.
  • Un akohida di mucha mes no tin nodi di proba esaki ora di entregá e petishon pa kompensashon pa akohida di mucha. E Unidat SZW di RCN ta kontrolá esaki. Sí ta konsehabel pa, ora di sera e akuerdo, puntra si e mayor tin un sédula, di moda ku bo no ta haña bo ku sorpresa.
  • Entidat Públiko por hasi un eksepshon den kasonan spesial. Por ehèmpel ora e mucha òf e mayor ta un refugiado. E ora ei, e Kolegio Ehekutivo por konsehá pa tòg duna e kompensashon pa akohida di mucha, pasobra e ta na benefisio di e mucha. Un mayor por pidi un eksepshon asina serka e Entidat Públiko:
    • • Na Boneiru: directie Samenleving en Zorg (direktiva Komunidat i Kuido), Kaya Neerlandia 41. E oranan di konsulta riba djaluna, djárason i djabièrnè di 8 or pa 11 or di mainta.
      • Na Saba: departamento Desaroyo di Komunidat & Kultura.
      • Na Sint Eustatius: direktiva Dominio Sosial.
  • E mayor(nan) i e mucha no ta inskribí i no tin un eksepshon na vigor (por ehèmpel den kaso di trabou temporal na e isla)? E ora ei e mucha por bai e akohida sí, pero e ora ei e akohida di mucha mes mester kobra e mayor(nan) minimalmente e suma di e kompensashon pa akohida di mucha.
• E akohida di mucha tur luna ta kobra e kontribushon di mayor.
• E akohida di mucha no ta kobra e mayornan sèn òf produktonan èkstra riba e kontribushon di mayor. Pues tampoko (un kontribushon pa) bruki, fruta i otro artíkulo òf un kontribushon boluntario. Rekoudá fondo i donashonnan sí ta permití, pero un donashon nunka mag determiná kua mucha por partisipá na un aktividat, sí òf nò.
• Por papia di akohida struktural. Esei ta nifiká ku e mucha generalmente ta presente riba e dianan ku a palabrá:
  • Un mucha tin mas ku tres luna siguí ousente (pafó di e fakansinan di skol)? E ora ei no por papia mas di akohida struktural, i e derecho riba e kompensashon ta para.
  • Un mucha ta ousente pasobra e tin un eksonerashon di e deber di enseñansa obligatorio? E ora ei ta mira esei komo ousensia insidental. E derecho riba kompensashon ta sigui eksistí e ora ei.

E montante di e kompensashon pa akohida di mucha ku un akohida di mucha ta haña di e Unidat SZW di RCN, ta dependé di e kantidat di mucha i e kantidat di parti di dia pa siman ku a palabrá por eskrito den e kontraktnan ku e mayornan.

• E kompensashon pa parti di dia ta diferente sigun e tipo di akohida i pa kada isla. Esei ta pasobra e gastunan ta diferente pa kada isla i sigun e tipo di akohida. Pa bebi te 1 aña tin un kompensashon èkstra (kompensashon pa bebi).
• E akohida di mucha solamente ta haña un kompensashon pa e partinan di dia ku tin pará den e kontrakt di akohida di mucha ku e mayor(nan). Esaki ta nifiká:
  • Por deklará solamente e partinan di dia ku a palabrá den e kontrakt di akohida di mucha.
  • Den kaso di akohida di mucha, esaki por ta maksimalmente 2 parti di dia pa dia, i maksimalmente 40 parti di dia pa luna.
  • Den kaso di akohida despues di skol (bso), riba un dia di skol normal esaki por ta maksimalmente 1 parti di dia pa dia, i maksimalmente 20 parti di dia pa luna.Den e fakansinan di skol i riba dianan di estudio di e skol, esaki por ta maksimalmente 2 parti di dia pa dia, ku un máksimo di 40 parti di dia pa luna.
• Determinashon di montante di e kompensashon pa parti di dia ta tuma lugá a base di un investigashon independiente di e gastunan pa akohida di mucha. E investigashon aki ta tuma lugá un biaha den kada 5 aña. E sumanan provisorio te ku 2030 bo por haña riba e wèpsait www.rijksdienstcn.com/akohidadimucha.
• Tur aña ta adaptá e sumanan. Esaki ta tuma lugá a base di kambionan den suèldu i preis na Hulanda Karibense. Gobièrnu ta usa datonan di CBS pa esaki. E sumanan nobo ta keda anunsiá na fin di aña.

Un akohida di mucha por pidi kompensashon pa akohida di mucha pa kada lokalidat serka e Unidat SZW di RCN.

• Bo por hasi e petishon promé ku kuminsamentu di un kuartal nobo. Riba www.rijksdienstcn.com/akohidadimucha bo ta mira na ki momentu bo mester hasi e petishon pa por risibí e kompensashon pa akohida di mucha na komienso di e kuartal.
• Pa bo petishon bo ta hasi uso di e formulario di petishon di RCN unidat SZW (un fail di Excel). Aki bo ta yena entre otro e datonan di kada mucha i di e mayor(nan), manera nan ta pará den e kontrakt di akohida di mucha ku e mayor(nan). Ta importante pa bo yena e formulario kompletamente i di forma honesto.
• Ora bo a yena e formulario kompletamente, bo ta mira mesora kuantu kompensashon bo ta bai haña probablemente.
• Kontrolá bon si tur e datonan ta klòp promé ku bo manda e formulario. Bo a hasi un kambio despues? E ora ei, por surgi un tardansa den e pago, i kisas por hasi e pago te despues di komienso di e kuartal.
• Bo ta dunando akohida na mas mucha for di loke ku bo a pidi durante e kuartal? E ora ei bo por hasi un petishon èkstra. E ora ei bo mester tin e kontraktnan pa akohida di mucha èkstra tambe den bo atministrashon.
• E unidat SZW di RCN por pidi informashon adishonal. Por ehèmpel na e promé petishon, òf ora a surgi un kambio. Por ehèmpel un kopia di un estado di kuenta di banko firmá. E Unidat SZW di RCN ta usa e dokumento aki pa kontrolá bo datonan. Asina nan por sa sigur ku e sèn ta yega na e lugá korekto.
• Huntu ku bo petishon, bo no tin nodi di manda komprobantenan èkstra, manera kontraktnan di akohida di mucha òf listanan di presensia. Sí, bo mester warda e dokumentonan aki bon den bo propio atministrashon (wak tambe Atministrashon akohida di mucha). E Unidat SZW di RCN por pidi pa nan despues, durante un kontrol.
• Bo petishon ta kompleto? E ora ei bo ta haña un konfirmashon di e Unidat SZW di RCN mas pronto posibel. Bo petishon no ta kompleto? E ora ei bo ta haña un aviso ku e petishon pa kompletá e datonan ku falta.
• Despues di e kontrol, bo ta risibí un disposishon. Esei ta un karta den kua tin pará:
  • Si bo ta haña kompensashon pa akohida di mucha, i kuantu
  • Ki ora ta paga e suma i riba kua number di kuenta ta depositá e sèn
  • Otro remarkenan importante

  A nenga (un parti di) bo petishon? E ora ei, den e karta bo por lesa pakiko. Bo por apelá e ora ei.

• Bo no ta haña kompensashon pa un mucha? E ora ei, e Unidat SZW di RCN ta informá e mayor tambe tokante esaki.
• Bo derecho riba kompensashon pa akohida di mucha por stòp entrante e promé dia di e luna siguiente, ora:
  • Bo no ta kumpli mas ku e kondishonnan.
  • A stòp e kontrakt di akohida di mucha ku e mayor.
  • E mayor, pa tres luna siguí, no a paga e kontribushon di mayor (paga tinu: bo mester kobra e kontribushon di mayor tur luna, sí).

  Ora surgi ún di e situashonnan aki, ta importante pa bo mèldu esaki serka e Unidat SZW di RCN. Asina bo ta evitá ku despues bo mester paga kompensashon pa akohida di mucha bèk.

Riba www.rijksdienstcn.com/akohidadimucha bo ta haña tur informashon tokante petishon pa kompensashon pa akohida di mucha, e kondishonnan i ehèmpel di dokumentonan útil. Tambe bo ta lesa ki yudansa bo por haña ora di hasi e petishon i yudansa pa ordená bo atministrashon.

Bo tin duda òf pregunta? Tuma kontakto ku e Unidat SZW di RCN via kinderopvang@rijksdienstcn.com.

E Unidat SZW di RCN ta kontrolá si organisashonnan pa akohida di mucha ta tene nan mes na reglanan. Asina ta posibel pa drecha fout i atendé ku eventual mal uso. Loke ta konta aki:

• Tèstnan arbitrario: E Unidat SZW di RCN por hasi tèstnan arbitrario. E ora ei nan ta kontrolá si e datonan ku bo a duna nan ta klòp. Nan por bin wak bo atministrashon (finansiero) pa hasi esei.
• Kontrol regular: Ta kontrolá kada akohida di mucha por lo ménos un biaha, kada tres aña. Tin biaha, por bini un kontrol èkstra entre nan tambe, ku òf sin anunsio adelantá.
• Bon atministrashon obligatorio: Bo mester a organisá bo atministrashon di tal manera ku bo por duna tur e datonan nesesario mesora i por kompleto na e Unidat SZW di RCN (wak tambe atministrashon akohida di mucha).
• Tin foutnan den e atministrashon? Ora bo atministrashon no ta na òrdu, bo ta haña un órden di korekshon di e Unidat SZW di RCN. A paga bo muchu sèn? E ora ei bo mester paga esei bèk.
• Tin sospecho di foutnan den un akuerdo? E Unidat SZW di RCN ta kere ku tin algu ku no ta klòp den un kontrakt di akohida di mucha ku un mayor? E ora ei nan por pidi bo pa tuma kontakto ku e mayor(nan) ei.
• Informá tokante kambionan: Bo tin e obligashon pa informá e Unidat SZW di RCN mesora tokante e siguiente kambionan:
  • Ora stòp un akuerdo pa akohida ku un mayor.
  • Ora bo stòp ku bo akohida di mucha.
  • Ora hala bo pèrmit aden.
• Bo a haña muchu hopi kompensashon? E ora ei, bo mester paga bèk e montante ku bo a risibí di mas. E Unidat SZW di RCN por kompensá esaki ku pagonan den futuro tambe. Asina esaki ta bai:
  • Bo ta haña un disposishon ku ta bisa kuantu bo mester paga bèk. Bo no ta di akuerdo ku esei. Bo por apelá e ora ei.
  • Den e disposishon tambe tin pará ki ora bo mester paga. Paga na tempu pa evitá un rekordatorio, gastunan èkstra, òf gastunan di deurwaarder.
  • Bo no por paga e suma, òf no den un biaha? Bo mes tuma kontakto mas pronto posibel e ora ei ku e Unidat SZW di RCN. Kisas un areglo di pago ta posibel.
• But den kaso di violashon: Ora bo violá e reglanan konsientemente, òf ora di un fout severo, e Unidat SZW di RCN por duna un but.

Pa petishon i kontrol di kompensashon pa akohida di mucha, ta importante pa un akohida di mucha warda e siguiente dokumentonan pa minimalmente 5 aña, despues ku e dokumento no ta aktual mas:

• Pèrmit di eksplotashon di e lokalidat
• Kontraktnan pa akohida di mucha ku mayor(nan)
• Fakturanan i pruebanan di pago
• Pruebanan ku a kanselá inskripshon di e mucha
• E listanan di presensia semanal

Riba e wèpsait www.rijksdienstcn.com/akohidadimucha bo por haña pa mas tardá for di òktober 2025 ehèmpel di e dokumentonan aki, ku e datonan mínimo ku ta nesesario.

Fuera di e dokumentonan nesesario pa kontrol di e kompensashon pa akohida di mucha, un akohida di mucha mester warda e siguiente dokumentonan pa por lo ménos 2 aña, despues ku e dokumento no ta aktual mas:

• Deklarashonnan tokante kondukta (VOGnan; esakinan asta mester warda 3 aña!)
• Maneho di siguridat i salubridat
• Plan di maneho pedagógiko i edukativo
• Komposishon i reglamento di komishon di mayor (serka sentronan pa akohida di mucha ku mas ku 50 mucha)
• Komprobantenan di eksigensianan di estudio (diplomanan di kolaboradónan)
• Komprobantenan di eksigensianan di eksperensia
• Sertifikadonan di EHBO

Mayornan ku ta hasi uso di un akohida di mucha ku ta risibí kompensashon pa akohida di mucha di gobièrnu, ta paga un kontribushon di mayor abou.

• Na 2026, pa e kantidat máksimo di partinan di dia mayornan na Boneiru ta paga 100 dòler pa luna na akohida di mucha, tantu pa akohida di mucha komo pa akohida despues di skol.
• Na Saba i Sint Eustatius na aña 2026, pa e kantidat máksimo di partinan di dia, mayornan ta paga pa luna:
  • 75 dòler pa akohida di mucha
  • 40 dòler pa akohida despues di skol
• For di 2027, e kontribushon di mayor lo ta 4 porshento di e gastunan total di akohida di mucha. Esei ta 4,17 porshento di e kompensashon pa akohida di mucha.
• Ora un mayor usa ménos ku 5 dia di akohida pa siman, e kontribushon di mayor pa dia ta 20 porshento di e kontribushon di mayor máksimo.
• Ora e akohida ta será, por ehèmpel den fakansi, un mayor no mester paga kontribushon di mayor.
• Tur luna, e akohida di mucha òf e gastouder ta manda un kuenta pa e mayor i ta hasi esfuerso pa kobra e montante.
• Ora un mayor no paga e kontribushon di mayor pa 3 luna siguí, e mayor ta pèrdè e derecho riba e lugá na e akohida. E akohida di mucha por stòp e kontrakt di akohida di mucha e ora ei.
• Ora un akohida di mucha no ta risibí kompensashon di gobièrnu pa un mucha, pero sí pa otro muchanan, e mayor di e mucha mester paga minimalmente e suma di e kompensashon pa akohida di mucha.
• Mayornan ku no por paga e kontribushon di mayor, por pidi un kompensashon pa e kontribushon di mayor ku mester paga. E mayornan por pidi esaki serka e Entidat Públiko:
  • Na Boneiru: Direktiva Komunidat i Kuido, Kaya Neerlandia 41. E oranan di konsulta ta riba djaluna, djárason i djabièrnè, di 8 or pa 11 or di mainta.
  • Na Sint Eustatius: Unit Social Support.
  • Na Saba: Departamento Desaroyo di Komunidat & Kultura.

  E Entidat Públiko ta stipulá e kondishonnan, por ehèmpel ku kua entrada un mayor tin derecho riba e supsidio aki, tambe tin biaha yamá supsidio pa lugá na akohida. Ora aprobá e petishon, e Entidat Públiko ta paga e kontribushon di mayor direktamente na e akohida di mucha.

Un akohida di mucha ku ta risibí e kompensashon pa akohida di mucha di gobièrnu, no mag nenga un mucha. E regla aki konosé algun eksepshon. Por nenga un mucha solamente ora:    

• No tin lugá pa e mucha a base di e pèrmit di eksplotashon òf e eksigensianan vigente, manera e kantidat di mucha pa kolaboradó òf e espasio disponibel.
• E akohida no por duna e mucha e sosten korekto, di moda ku e akohida no por duna e mucha (òf otro muchanan) un akohida responsabel.
• E akohida no ta pidi kompensashon pa akohida di mucha serka e Unidat SZW di RCN mes, pues tampoko pa otro muchanan.
• E akohida ta kere ku e mayor(nan) no ta bai paga, pasobra e mayor(nan) ya a yega di keda sin paga tres luna largu. E ora ei mester a terminá e kontrakt di akohida anterior durante e último 6 lunanan pa motibu di e retraso den pago aki.
• Pa konseho i mediashon ora un akohida di mucha nenga un mucha òf terminá e kontrakt e mayor por bai:
  • Na Boneiru: Sentro Akseso (717 7300)
  • Na Sint Eustatius: e Entidat Públiko, directie Sociaal Domein (direktiva Dominio Sosial)
  • Na Saba: e Entidat Públiko, afdeling Community Development & Culture (departamento Desaroyo Komunidat & Kultura)

Den interkambio òf wardamentu di datonan di mucha, semper mester tuma medidanan bon pa protehá nan privasidat:

• Kompilá solamente datonan personal ku realmente ta nesesario, por ehèmpel pa petishon pa kompensashon di akohida di mucha òf pa un akohida seif.
• Limitá ken tin akseso na e datonan. Ménos hende por yega na nan, mas chikí e chèns pa mal uso.
• Uza protekshon moderno, di moda ku e datonan ta bon protehá, por ehèmpel kontra hacker.

Entre akohida di mucha i skol básiko

Ora un mucha bai skol básiko, e akohida di mucha ta duna e skol informashon tokante desaroyo di e mucha. Esaki ta yuda pa laga e traspaso pa skol kana bon.

• E mayor mester duna pèrmit por eskrito pa kompartí e informashon aki ku e skol. Sin pèrmit, e akohida di mucha no mag duna e skol e datonan. E ora ei, e skol mes mester pidi e mayornan pa e informashon.
• E informashon ku ta kompartí, solamente ta tokante desaroyo di e mucha den e siguiente áreanan:
  • Abilidat ku idioma
  • Abilidat ku matemátika
  • Desaroyo motóriko
  • Desaroyo sosial i emoshonal
  • Otro informashon, manera tokante salú òf e situashon na kas, solamente e mayornan mes por kompartí ku e skol.
• Solamente por kompartí datonan di e mucha di un manera seif:
  • Ku hendenan ku realmente tin mester di e informashon aki (por ehèmpel e dosente).
  • Di un manera seif, por ehèmpel ku un password òf via enkripshon.
  • E akohida di mucha i e skol mester warda e datonan na un kaminda seif, di moda ku solamente personanan outorisá por mira nan.
• E akohida di mucha mester warda e datonan dos aña despues ku e mucha a bai for di e akohida.

Entre akohida di mucha i POA

Pa un akohida di mucha bon i responsabel, por ta nesesario pa kompartí informashon ku e organisashon(nan) ku ta duna sosten i konseho pedagógiko (POA). Pa esei, e siguiente reglanan ta na vigor:

• E mayornan mester duna pèrmit por eskrito promé ku e akohida mag kompartí dato ku e organisashonnan aki.
• E akohida di mucha i e organisashon ku ta duna sosten mester sera un kontrakt di prosesamentu di dato. Akiden tin afspraknan tokante kon ta kompartí i usa e datonan personal di un manera