Pa akohida di mucha bon i responsabel, ta importante pa e kolaboradónan ta bon eduká.

• Te promé di yanüari 2031, pa sentro di mucha ta konta un kualifikashon di tim, di moda ku por lo ménos mitar di e kolaboradónan pedagógiko na e lokalidat:
  • Tin minimalmente un estudio mbo-3 pa kolaboradó pedagógiko òf un estudio na nivel 3 ku un komponente pedagógiko.
  • Tin un estudio mbo-2 òf CVQ-2 kompletá, ku komprobante adishonal ku kua por proba ku e kolaboradó por hasi trabou na nivel di mbo-3.
    E eksigensianan ku ta konta pa komprobantenan adishonal bo por lesa aki bou.
    Paga tinu: Ora di tuma personal, e preferensia ta pa tuma kolaboradónan ku un diploma na nivel di mbo-3.
  • Ta traha promé ku promé di yanüari 2026 den e akohida di mucha, a nase promé ku òf na 1975, i tin por lo ménos 15 aña di eksperensia den akohida di mucha. Solamente den e kaso aki, un kolaboradó no tin nodi di tin un diploma mbo-2 òf mbo-3, òf di bai optené esaki.
• E otro mitar di e kolaboradónan pedagógiko por konsistí di:
  • Stazjèr ku ta siguiendo un estudio mbo.
  • Kolaboradó ku ainda ta studiando pa un mbo-3.
  • Kolaboradó ku un estudio mbo-2 òf CVQ-2 pa kolaboradó pedagógiko òf ku un komponente pedagógiko.
• Ora un kolaboradó tin un diploma di eksterior, por pidi un evaluashon di e diploma via www.idw.nl. Esaki ta dura por lo ménos 6 siman i ta kosta sèn.
• Si tin stazjèr, kolaboradó siguiendo un estudio, òf kolaboradó na nivel mbo-2 òf CVQ-2 ta traha, e doño di e akohida di mucha mester:
  • Sòru pa bon guia.
  • Tene kuenta ku nan edukashon, eksperensia i konosementu na e momentu ei.
  • Pa stazjèr i empleado ku ta sigui un estudio tambe mester tin un persona ku un nivel mínimo di MBO-3 ta traha riba e grupo, huntu ku e stazjèr òf empleado den estudio. Esaki no ta nesesario pa empleadonan ku nivel di mbo-2 òf CVQ-2.
• Durante e akohida di mucha semper mester tin por lo ménos ún adulto presente ku tin un diploma di EHBO pa mucha. E persona aki sa kiko mester hasi den kaso di emergensia. E por:
  • Evaluá si un situashon ta seif.
  • Den un situashon peligroso, sòru pa e mes i otronan ta seif.
  • Embolbí asistensia profeshonal ora esei ta nesesario.
  • Rekonosé ki ora un mucha no ta hala rosea bon, a bai for di dje, òf tin problema ku sirkulashon di sanger – i aktua e ora ei di forma adekuá.
  • Reanimá muchanan si esaki ta nesesario.
  • Duna promé asistensia, por ehèmpel den kaso di kemadura, venenamentu, sofokamentu, herida i sangramentu i leshon na kabes, múskulo, wesu òf skarnir.
    Paga tinu: E diploma di EHBO no por ta mas ku 2 aña bieu. Diploma entregá promé ku 1 di yanüari 2026 ta keda bálido te ku 2 aña despues di entrega.

*Pa gastouder, e siguiente reglanan ta konta:

• Un gastouder mester tin un estudio ku un nivel mínimo di mbo-2 òf CVQ-2.
• Durante e akohida, semper mester tin un adulto presente ku por duna promé asistensia na mucha. Esaki por ta e gastouder mes, ora e tin un diploma di EHBO ku ta kumpli ku e reglanan i no ta mas ku 2 aña bieu.

Por laga un persona ku un diploma mbo-2 òf diploma CVQ-2 i sufisiente eksperensia den trahamentu ku mucha, traha ku e pruebanan di e eksperensia akí den un sentro di mucha komo kolaboradó riba nivel-3. Pa esei mester resultá kla for di e pruebanan, ku e kolaboradó por ehekutá e siguiente tareanan riba nivel mbo-3:

• Guia muchanan den nan desaroyo
• Traha riba kalidat i profeshonalismo
• Eduká i desaroyá e mucha/muchanan na e akohida di mucha

Mester por mira e tres tareanan akí klaramente den e pruebanan. Por inkluí otro tareanan tambe ei den, pero e tresnan akí ta obligatorio. Asina e organisashon di akohida di mucha i inspekshon por kontrolá adekuadamente si e kolaboradó ta kumpli ku e eksigensianan di eksperensia.

Kon mester demostrá ku un profeshonal tin e eksperensia korekto?
Huntu ku e pruebanan mester tin sufisiente prueba ku ta demostrá ku e kolaboradó por ehekutá e tres tareanan riba nivel mbo-3. Huntu ku e prueba mester tin tambe un splikashon por eskrito dikon saki ta demostrá ku e kolaboradó ta disponé di sufisiente eksperensia. E prueba por ta por ehèmpel:

• Referensia di anterior dunadónan di trabou
• Grabashon òf pòtrèt di e trabou
• Sertifikado di kurso òf entrenamentu ku a sigui
• Relato-, plan- òf programanan ku e kolaboradó mes a traha

E doño di un sentro di mucha ta responsabel pa evaluashon di e pruebanan. E doño mester determiná si e kolaboradó, ku e prueba i splikashon, ta demostrá sufisientemente ku e por ehekutá tareanan riba nivel mbo-3. E doño por hasi uzo di un sertifikado di eksperensia (EVC, por ehèmpel di Edudesign). Pero paga tinu: e doño mester disponé e ora ei tambe di e prueba básiko ku a usa pa formulá e sertifikado di eksperensia.

Kada akohida di mucha mester sòru pa un Deklarashon tokante Kondukta (VOG) bálido i resien pa kada adulto ku ta presente na e lokalidat di akohida òf tin akseso na informashon tokante e muchanan:

• Esaki ta konta pa e doño di e akohida di mucha òf e gastouder, e direktor i e direktiva i pa kada kolaboradó, empleado temporal, stazjèr, i boluntario.
• Promé ku e persona kuminsá traha na e akohida, e mester a entregá un VOG serka e akohida di mucha.
• Na e momentu di entrega, e VOG no por ta mas ku 3 luna bieu.
• Mester pidi kada VOG di nobo kada pasa 2 aña. Den kaso di traspaso pa un otro organisashon pa akohida di mucha, tambe mester pidi un VOG di nobo.
• E doño di e akohida di mucha òf gastouder mester warda kada VOG pa por lo ménos 3 aña.
• Ora inspekshon ta kere ku un hóben di 12 aña òf mas na e akohida no ta kumpli ku e eksigensianan di e VOG, inspekshon por eksigí un VOG pa e menor di edat aki tambe.

Na Boneiru, e idioma ku ta papia den e akohida di mucha ta papiamentu òf hulandes.
Na Sint Eustatius i Saba, e idioma ku ta papia den e akohida di mucha ta ingles òf hulandes.

• Un doño di e akohida di mucha òf gastouder ta deskribí den e plan di maneho pedagógiko kua idioma ta papia.
• Kolaboradónan pedagógiko mester por e idioma ku ta papia ku e muchanan bon.
• Si desaroyo òf situashon di un mucha ta rekerí esei, un kolaboradó pedagógiko por papia un otro idioma tambe ku un mucha.

E kantidat di profeshonalnan ku ta nesesario, ta dependé di edat i kantidat di mucha den un grupo. Mas yòn e muchanan ta, mas profeshonalnan mester tin:

• E tamaño máksimo di grupo i e kantidat mínimo di profeshonal (esaki yama e proporshon di profeshonal-mucha) ta den e tabèlnan. E kantidatnan aki ta konta pa aktividatnan paden i pafó di e sentro di mucha.
• Ora tin mucha for di e akohida di mucha i mucha for di e akohida despues di skol den e mesun grupo, e proporshon di profeshonal-mucha di e akohida di mucha ta konta.
• Den e kolòm na man drechi por mira kuantu mucha por tin maksimalmente den un grupo. Tin mas ku esei? E ora ei mester splet e grupo, tambe ora tin 3 kolaboradó pa guia e grupo.
• Ora tin solamente ún kolaboradó presente den e akohida di mucha, mester tin un otro adulto ku ta alkansabel via telefòn i ku por ta presente na e lokalidat denter di 15 minüt den un kaso di emergensia. Esaki yama e adulto standby.

Akohida di mucha – gruponan horizontal (e mesun edat)

Edat mucha	Kantidat mínimo di profeshonalnan	Kantidat máksimo di mucha	Kantidat mínimo di profeshonalnan	Kantidat máksimo di mucha den e grupo
0 pa 1	1	4	2	8
1 pa 2	1	6	2	15
2 pa 4	1	8	2	16

Akohida di mucha –gruponan vertikal (edatnan mesklá)

Edat mucha	Kantidat mínimo di profeshonalnan	Kantidat máksimo di mucha	Kantidat mínimo di profeshonalnan	Kantidat máksimo di mucha den e grupo
0 pa 2	1	5 (max 3 di 0 pa 1)	2	10 (max 6 di 0 pa 1)
0 pa 4	1	6 (max 3 di 0 pa 1)	2	12 (max 6 di 0 pa 1)
2 pa 4	1	8	2	16

Akohida despues di skol

Edat mucha	Kantidat mínimo di profeshonalnan	Kantidat máksimo di mucha	Kantidat mínimo di profeshonalnan	Kantidat máksimo di mucha den e grupo
4 pa 7	1	10	2	20
7 te ku fin di enseñansa básiko	1	12	2	24
4 te ku fin di enseñansa básiko	1	11 (max 8 di 4 pa 7)	2	22 (max 10 di 4 pa 7)

*Un gastouder por duna akohida na maksimalmente 6 mucha pareu, te e edat di 13 aña. E eventual yunan propio di e gastouder te ku 10 aña tambe ta konta. Den e grupo di 6 mucha por duna akohida na un kantidat limitá di mucha yòn:

• Maksimalmente 2 mucha bou di 1 aña
• Maksimalmente 4 mucha bou di 2 aña
• Maksimalmente 5 mucha bou di 4 aña

Durante e akohida di mucha, un gastouder mester tin un adulto standby pa kasonan di emergensia. Esaki ta un adulto ku ta alkansabel via telefòn i ku por ta presente na e lokalidat denter di 15 minüt den un kaso di emergensia.

• Un akohida di mucha riba un dia por funshoná pa 3 ora ku ménos kolaboradó. Por ehèmpel pa 1 ora i mei den mainta i 1 ora i mei den mèrdia. Esaki ta permití solamente ora kumpli ku e siguiente kondishonnan:
  • E akohida mester ta habri pa un mínimo di 10 ora kada dia.
  • E mester klòp ku loke tin pará den e plan di maneho pedagógiko i edukativo tokante ménos kolaboradó na sierto momentunan.
  • Den e oranan ku ménos kolaboradó, en todo kaso mitar di e kantidat di kolaboradó ku normalmente ta nesesario mester ta presente sigun e tabèlnan.
  • E kantidat di personal desviante por ta diferente pa kada dia di trabou, pero e mester ta meskos tur siman.
• Serka e akohida despues di skol (bso) bo por traha ku ménos kolaboradó pa 3 ora solamente riba dianan ku skol básiko tin liber, òf den e fakansinan di skol. Riba dianan di skol normal, e kantidat di kolaboradó por ta ménos solamente pa  mei ora pa dia. E ora ei tambe, ménos ku mitar di e kantidat obligatorio di kolaboradó mester ta presente.
• Ora ku pa motibu di e kantidat limitá di kolaboradó, solamente ún kolaboradó ta presente den e sentro di mucha, mester tin minimalmente ún otro adulto disponibel pa yuda ora esei ta nesesario.
• Kada dia, e akohida di mucha mester nota kuantu kolaboradó tin i kua mucha ta presente, i e oranan ku nan ta drenta i sali. Ku e lista di presensia aki ta posibel pa kontrolá si tin sufisiente kolaboradó pa e kantidat di mucha.   

*Pa motibu di e índole i e eskala chikí, e reglanan aki no ta konta pa gastouder.

Un sentro di mucha ta sòru pa un akohida pa mucha ku ta di konfiansa i stabil, dor di traha ku gruponan fiho i karanan konosí:

• Kada mucha ta den ún grupo fiho. Den akohida di mucha, esaki yama un ‘stamgroep’. Den akohida despues di skol esaki yama un grupo básiko.
• E tamaño di e grupo ta dependé di e edat di e mucha. Muchanan mas grandi por ta den un grupo mas grandi (wak den e tabèlnan pa mira e reglanan).
• Den kada grupo mas tantu posibel tin e mesun kolaboradónan ta traha.
• Kada mucha tin un mentor fiho. E mentor aki ta papia regularmente ku e mayornan tokante desaroyo di nan yu. Tambe, mayornan por akudí na e mentor pa pregunta tokante nan yu.
• Muchanan kada bes ta den e mesun espasio. Den akohida di mucha, den un siman por duna akohida na un mucha den un máksimo di dos espasio diferente.
• E mayornan i e muchanan ta tende den kua grupo e mucha ta i ken ta e kolaboradó fiho òf e mentor di e yu.

* Pa motibu di e índole i e eskala chikí, e reglanan aki no ta konta pa gastouder.