Kuido di kalidat ta nifiká ku bo ta pensa bon tokante kiko bo ke logra ora ta trata di mehorashon di e kalidat. E ta nifiká ku bo ta traha plannan pa esei, wak si ta bai bon, i kontinuamente ta sigui mehorá. Pa un akohida di mucha esaki ta nifiká ku e doño di e akohida di mucha:

• Ta skibi e metanan pa kalidat den e plan di maneho pedagógiko i edukativo. Huntu ku esei tambe mester tin un plan di akshon i planifikashon pa alkansá e metanan, i un evaluashon periódiko di esei.
• Ta traha tiki tiki na ehekushon i mehorashon di e maneho pedagógiko i edukativo, e maneho di siguridat i salubridat, i maneho di e organisashon. Ademas ta traha den e siklo di kreashon, implementashon i aplikashon, evaluashon i kontrol, i renobashon di maneho. Di moda ku e akohida di mucha kada bes ta bai funshoná un tiki mas mihó.
• Ta sòru ku realmente ta ehekutá e afspraknan di maneho, tambe. Por ehèmpel dor di kontrolá regularmente den e gruponan si tur kos ta bai bon, i/òf dor di hasi evaluashonnan ku e tim.

*Un gastouder ta traha riba ehekushon i mehorashon di e maneho pedagógiko i edukativo, i e maneho di siguridat i salubridat. Fuera di esei, un gastouder no mester tin metanan di kalidat i un plan di akshon.

Un kultura di kalidat profeshonal ta nifiká ku huntu boso ta sigui siña i mehorá. E doño di e akohida di mucha ta sòru pa:

• Afspraknan kla tokante ken ta hasi kiko: ken tin kua tarea, papel, i responsabilidat.
• Un ambiente di trabou seif i profeshonal, kaminda e hendenan tin gana di siña i bira mihó den nan trabou.
• Un maneho di kapasidat, di moda ku e kolaboradónan ta haña chèns pa desaroyá nan mes i siña mas, di moda ku nan ta sigui ta bon den nan trabou.

*Un gastouder tambe ta traha riba mehorashon di e kalidat di e akohida di mucha, i si esei ta nesesario, e ta haña asistensia di Sentro Akseso.

E doño di e akohida di mucha òf gastouder ta sòru ku e mayornan i e kolaboradónan ta bon informá. Nan ta haña informashon tokante:

• E maneho ku ta konta den e akohida, ku en todo kaso ta inkluí e maneho di siguridat i salubridat i e maneho pedagógiko-edukativo.
• E informe di inspekshon. Mester por haña e informe aki mas lihé i mas fásilmente posibel riba e wèpsait di e akohida. E akohida no tin un wèpsait? E ora ei e informe mester ta na un kaminda ku e mayornan i e kolaboradónan por les’é fásilmente.

Kada sentro di mucha mester tin un manera kla pa trata ku kehonan di mayornan tokante e kontrakt di akohida di mucha òf komportashon di e doño di e akohida di mucha òf e kolaboradónan. E doño di e akohida di mucha mester:

• Boneiru: Skibi e prosedura di keho den e plan di maneho pedagógiko. E mayornan mester sa bon kiko nan por hasi ora nan tin un keho. P’esei, mester pone e prosedura di keho huntu ku e akuerdo ku ta sera ku e mayornan. Tambe por kologá e prosedura di keho na un kaminda ku por mir’é kla den e lokalidat di akohida.
• Saba i Statia: Pone e prosedura di keho riba papel i informá e mayornan tokante esaki.
• Deskribí den e prosedura di keho:
  • Kon ta risibí, investigá i evaluá un keho.
  • Kon ta tuma un desishon tokante e keho.
  • Kon ta sòru pa ehekushon di e medidanan.
• Sòru pa e investigashon tokante un keho tuma lugá di un forma kouteloso i honesto. Niun di e hendenan ku ta embolbí ku trato di e keho no por ta embolbí ku e keho, nan mes.
• Tene e persona ku ta entregá e keho bon na altura tokante e resepshon, e término di atendé, e posibilidat di un kòmbersashon ku e doño di e akohida di mucha, progreso di e investigashon, e resultado, i e desishon kompañá pa un splikashon.
• Pa un konseho independiente, asistensia òf mediashon den kasonan di keho, mayornan por akudí na:
  • Na Boneiru: Sentro Akseso (717 7300).
  • Na Sint Eustatius: e Entidat Públiko, directie Sociaal Domein (direktiva Dominio Públiko).
  • Na Saba: e Entidat Públiko, afdeling Community Development & Culture (departamento Desaroyo di Komunidat & Kultura).

*Pa gastouder un prosedura di keho no ta obligatorio.

Ora ta duna akohida na mas ku 50 mucha den e sentro di mucha, mester tin un komishon di mayor. E komishon aki ta yuda pensa tokante kon e akohida ta reglá. E doño di e akohida di mucha:

• Denter di 6 luna despues di haña e pèrmit, ta traha un reglamento. E ta kontené en todo kaso:
  • Kuantu miembro tin.
  • Kon ta skohe e miembronan.
  • Pa kuantu tempu nan ta sigui ta miembro.

  Por kambia e reglamento aki despues, ku pèrmit di e komishon di mayor. E komishon di mayor mes ta determiná kon nan ta traha.

• Ta duna e mayornan chèns pa bira miembro di e komishon di mayor. Kolaboradónan di e akohida no por bira miembro.
• Ta pidi e komishon di mayor konseho tokante e maneho pedagógiko, nutrishon, edukashon, siguridat i salubridat, oranan di apertura i kambionan den e areglo di keho. E komishon di mayor mes tambe por duna konseho sin ku e doño di e akohida di mucha ta pidi p’e.
• Tin konsulta por lo ménos un biaha pa aña ku e komishon di mayor tokante e maneho pedagógiko aktual i futuro.
• Ta duna tur informashon ku e komishon di mayor tin mester por eskrito.
• Ta desviá for di e konseho di e komishon di mayor solamente por eskrito i bon fundamentá.

Ora e sentro di mucha realmente a hasi esfuerso pero no a logra lanta un komishon di mayor, un otro forma di embolbimentu di mayor tambe ta bon.

*Sentronan di mucha mas chikí i gastoudernan no ta obligá pa lanta un komishon di mayor.