Akohida di mucha

Aparte di eksigensianan di kalidat legal, organisashonnan di akohida di mucha mester kumpli ku algun eksigensia adishonal pa e petishon pa un pèrmit, e komishon di mayor i e prosedura di keho. Esakinan ta inkorporá den e Ordenansa Insular Akohida di Mucha Boneiru. Bo por haña esaki aki:

Download e konsepto di Ordenansa insular Akohida di mucha Boneiru (na Hulandes)

Ta importante pa mucha haña nutrishon (kos di kome i di bebe) salú, ya ku esaki ta bon pa nan desaroyo. P’esei krèsh i akohida despues di skol na Boneiru, ta kumpli ku eksigensia na nutrishon. Den e eksigensianan akí ta menshoná kon den e organisashon mester atendé ku nutrishon i higiena i kiko mester duna mucha. E eksigensianan na nutrishon ta sostené tarea ku lei ta duna Entidat Públiko Boneiru riba tereno di nutrishon salú. Entrante 1 di yüli 2026, inspekshon ta kontrolá si ta kumpli ku e eksigensianan.

Eksigensia na nutrishon salú

1. Krèsh i akogida despues di skol ta informá tur kolaboradó i tur mayor tokante nan maneho pa nutrishon salú (kos di kome i kos di bebe).
2. Mucha ta haña tempu pa kai sinta trankil si nan ta bai kome òf bebe algu. Ora nan ta kome òf bebe, mucha i nan guia no usa selular òf tèblet i televishon ta pagá.
3. Kolaboradó pedagógiko ta duna bon ehèmpel. Nan ta guia mucha i ta kome i bebe salú den presensia di mucha.
4. Ora di kome ta usa porshon rekomendá den ‘Guia akohida pa mucha: Nutrishon i higiena di nutrishon. Ta stimulá mucha pa kome e porshon akí, tin atenshon pa si un mucha a kome sufisiente (heful ku el a yena) i no ta fòrsa pa mucha kome.
5. Henter dia tin awa disponibel. Por ehèmpel awa friu, awa ku nan a laga fruta òf bèrdura trèk aden, awa ku yerba aden sin suku òf te friu sin suku.
6. Ta ofresé fruta diariamente. Por ehèmpel fruta fresku òf fruta dipfris sin suku agregá.
7. Tur dia mucha ta haña un kuminda kayente variá.
8. Tur dia tin bèrdura serka e kuminda kayente. Por ehèmpel bèrdura fresku òf berdura dipfris, den bòter òf den bleki. No a agregá salu òf suku na bèrdura dipfris, den bòter òf den bleki.
9. Sigur dos biaha pa siman ta usa produkto integral pa kuminda kayente. Por ehèmpel aros integral brùin, pasta di grano integral, òf kuskus di grano integral. ‘Whole grain’ ta meskos ku ‘integral.’
10. Mucha ta haña por lo ménos kuater biaha pa siman un kos pa tene stoma salú di e asina yamá disko di 5 (Schijf van 5). Por ehèmpel bèrdura, pan di grano integral ku kos di kome ariba, krèker di grano integral, yògùrt (no esun ku smak di fruta/òf ku suku agregá), fruta seká, òf palufriu a base di awa (sin suku agregá).
11. Ta tene kuenta ku alergia i intoleransia di mucha. Tin riba papel palabrashon hasí tokante esaki ku e mayornan.

 Higiena ora di prepará kuminda

1. Ta usa lechi di mama segun rekomendashon ku tin den ‘‘Guia akohida pa mucha: Nutrishon i higiena di nutrishon.’
2. Ta prepará lechi di bòter segun rekomendashon ku tin den ‘‘Guia akohida pa mucha: Nutrishon i higiena di nutrishon.’
3. Usa e plachi di 5x kuminda ku ta seif pa kome (5x veilig eten kaart) di ‘Guia akohida pa mucha: Nutrishon i higiena di nutrishon’ pa prepará i warda otro kuminda higiénikamente.

Pa start ku un akohida di mucha, un pèrmit di eksplotashon ta obligatorio. Bo mester pidi e pèrmit aki por eskrito serka e Entidat Públiko, na atenshon di e Kolegio Ehekutivo (BC). Mester hasi esaki tambe ora bo ke hasi kambio den datonan den e pèrmit. Bo mester manda e siguiente informashon i dokumentonan tambe huntu ku e petishon:

• Un kopia di e pèrmit di establesimentu
• Ora e ta un negoshi di un persona: nòmber, adrès, number di telefòn i un prueba di inskripshon serka Kámara di Komersio (no mas ku 3 luna bieu)
• Ora e ta un persona hurídiko: nòmbernan, adrèsnan, fechanan di nasementu di e miembronan di direktiva/gerensia, un kopia di e statutonan, prueba di inskripshon serka Kámara di Komersio (no mas ku tres luna bieu) i, si esaki ta aplikabel, un kopia di e registro di akshon
• Pruebanan di inskripshon den registro sivil di e petishonario i e kolaboradónan, i un ekstrakto di e títulonan di estadia i/òf pèrmitnan
• Un Deklarashon tokante Kondukta (VOG) di e petishonario i e profeshonalnan, no mas ku tres luna bieu
• E kantidat máksimo di mucha i e edat di e muchanan pa kada parti di dia
• E kantidat máksimo di profeshonalnan pa kada parti di dia
• E orario di apertura i di seramentu
• E adrès (proponé) di e akohida
• E plan di maneho pedagógiko i edukativo di e sentro di mucha
• E plan den fase di e kódigo di violensia doméstiko i maltrato di mucha di e sentro di mucha
• E maneho di siguridat i salubridat di e sentro di mucha
• Un mapa di e akohida (ku e midínan di e espasionan paden i pafó)
• E prueba di pago pa e leges

BC ta disidí si bo ta haña e pèrmit. BC ta pidi konseho serka e komishon di kalidat pa esei. Tambe, BC ta puntra inspekshon si e akohida di mucha por kumpli ku e reglanan den lei. E komishon di kalidat ta duna un konseho kompleto i BC ta disidí.

E prosedura di petishon generalmente ta dura mas o ménos dos luna. E periodo aki ta kuminsá kana solamente ora a entregá tur dokumento. Si ainda falta dokumento, e petishonario ta haña kuater siman pa entregá esakinan ainda. Solamente ora tur kos ta kompleto, e prosedura por kuminsá ofisialmente. Si e petishonario no entregá e dokumentonan nesesario denter di kuater siman, lo no tuma e petishon den konsiderashon.

E petishonario ta risibí un karta ku informashon tokante e prosedura:

• Ora e petishon ta kompleto, denter di dos siman Kolegio Ehekutivo ta pidi konseho serka e komishon di kalidat i inspekshon. Nan ta duna konseho denter di kuater siman.
• Despues, Kolegio Ehekutivo ta tuma un desishon denter di dos siman.
• Tin biaha mester di mas tempu. E ora ei por ekstendé e periodo aki ún biaha ku maksimalmente dos siman. Lo informá e petishonario tokante esaki.

Ta duna un pèrmit pa un tempu indefiní:

• E pèrmit ta pa un persona òf un organisashon spesífiko, i ta konta solamente pa e lokalidat pa kua a pidié.
• No por traspasá e pèrmit. Ora e nòmber riba e pèrmit kambia, mester notifiká e Entidat Públiko di esaki por eskrito.

Mester kologá e página dilanti di e pèrmit den e lokalidat na un kaminda ku e ta bon visibel. Riba dje tin e nòmber i e adrès di e portador di e pèrmit i e direktiva, e tipo di akohida di mucha, i e kantidat máksimo di mucha (ku e edatnan) ku por duna akohida.

Organisashonnan di akohida di mucha na Boneiru por konta riba diferente forma di sosten. Intenshon di e ayudo akí ta pa fortifiká kalidat di e akohida i brinda e mucha un ambiente ku ta sigur, orientá riba desaroyo i stimulante. Akibou bo ta lesa na unda organisashonnan por akudí i pa kiko.

Sosten pedagógiko – AKSESO / Tim Kalidat Akohida di Mucha (Team Kwaliteitszorg Kinderopvang)
Sentronan di akohida di mucha i gastoudernan por akudí ku tur nan petishon pa ayudo pedagógiko na e Tim Kalidat di Akohida di Mucha di AKSESO. E coachnan pedagógiko ta guia i sostené organisashonnan pa loke ta trata fortifikashon di e klima pedagógiko. Nan ta brinda entre otro:

• Coaching on the job
• Konseho tokante maneho pedagógiko i tradukshon di esaki den práktika
• Sosten ora ta trata di edukashon preeskolar (VVE) i stimulashon di desaroyo
• Training i profeshonalisashon
• Yuda opservá ora tin retonan den e práktika di akohida diario

E sosten akí ta yuda organisashonnan pa ofresé akohida di bon kalidat i sigui desaroyá kontinuamente nan manera di traha.

Sosten di Segundo nivel – Sentro di Ekspertisia Enseñansa & Kuido (Expertisecentrum Onderwijs & Zorg) (EOZ)
Algun mucha tin mester di sosten adishonal. Den e kaso ei Expertisecentrum Onderwijs & Zorg (EOZ) ta ofresé kuido di segundo nivel na organisashonnan di akohida di mucha. EOZ por yuda ku entre otro:

• Opservashon di mucha
• Konseho di akshon pa kolaboradónan pedagógiko
• Sosten pa e proyekto piloto ku gruponan ku tin mester di sosten adishonal
• Guia den kaso di preguntanan kompleho di desaroyo i kuido

 Paga tinu: Referensia pa EOZ i kompartí dato ta permití solamente ku aprobashon di mayornan, konforme e lei di privasidat. Esaki semper ta kana via AKSESO.

Tin pregunta òf tin mester di sosten?
Organisashonnan di akohida di mucha por tuma kontakto direktamente ku AKSESO – Tim Garantia di Kalidat Akohida di Mucha pa sosten pedagógiko, guia i konseho.